空氣污染嚴重，再加上近日熱浪襲港，留喺街上幾分鐘已經令人覺得勁難受。天文台前台長「黑英」林超英尋日喺個人網誌話，前日中午佢去咗佐敦同油麻地一帶，由於臭氧偏高，導致空氣已經變成「不能吸的空氣」，仲形容空氣中有刺鼻嘅氣味，導致佢吸一次就咳一次。佢曾經諗過忍住唔吸氣，不過唔抖氣會死，所以喺咳同死之間，佢選擇咳。

林超英

黑英大嘆，點解人擁有號稱解決所有問題嘅「高新科技」，但係竟然落得如此田地。佢仲叫精英分子到街上行吓，同普羅大眾一齊享受經濟繁榮嘅「成果」，到時就會明白升斗市民唔再視「經濟發展」為最高原則，係因為發展令到人類生存必備嘅空氣都冇埋。

跟住佢又進行「技術」分析，話當日吹西北風，故推斷香港嘅空氣污染源自上游深圳。佢慨嘆，港深追求經濟發展結果換來咁差嘅空氣，唔通GDP比空氣價值更高？