香港金融地位面臨上海挑戰，港人唔度新出路，好快死路一條。城中一班政商界名人月前組成「香港東盟經濟合作基金會」，秘書長Witman洪為民計劃引入東南亞資金由香港出專才，齊投資「一帶一路」。

洪為民鼓勵年輕專才關注東南亞發展機遇。

「一帶一路」東牽亞太經濟圈，東南亞班超級富豪都蠢蠢欲動，想話投資當中分一杯羹，但隔山買牛唔易。Witman話正造就機會畀港人，擔當「帶路人角色」。佢又自爆父母係印尼華僑，自細對當地頗熟悉，佢相信唔少青年專才都有呢個「親戚優勢」，大可以充分利用，開拓東南亞嘅發展機遇。

講番個基金會，仲搵咗行政會議成員陳智思擔任名譽主席，「公職王」鄭慕智係顧問委員會主席。至於會長就係銀行家林家禮，個個喺商界都有好強人脈。到底有乜想搞？原來係度緊將「一帶一路」等基建項目證券化，即係包裝成投資產品，再推銷畀東南亞投資者。Witman話月前佢哋到訪新加坡交流，今個月尾又會去新加坡，唔排除稍後去印尼、緬甸同越南等。殺唔殺到一條新出路，就要拭目以待嘞！