呢排香港出現高溫天氣，好多公公婆婆都鍾意到商場等公共地方歎冷氣，慳番屋企電費。出晒名貪小便宜嘅「貪曾」前特首曾蔭權爵士，早前被揭落鑊前「搬竇」到渣甸山嘅高級公務員宿舍，前晚佢一身「麻甩」伯伯嘅裝扮，現身住所附近跑馬地一間超級市場內，期間慢行歎冷氣，盡顯佢小器兼計到盡嘅本色。

貪曾一身「麻甩」伯伯裝扮到超市歎冷氣。（讀者提供）

爆醜聞後周圍匿

前晚近九時，正係天文台錄得最高市區溫度達三十六點三度，創出一百三十年以嚟最熱紀錄當晚，有眼尖讀者見到貪曾同太太曾鮑笑薇喺跑馬地一間超市出現。該讀者形容貪曾嘅裝束同「街邊阿伯冇分別」，而且頭髮稀白疏落，貪曾負責推超市手推車，全程同太太嘅對話唔多，當太太問意見時先至答兩嘴，期間一路有G4隨行。

貪曾喺三年前被踢爆「貪盡海陸空、歎盡省港澳」嘅涉貪醜聞後，一直飄泊無定「周圍匿」，最近「搬竇」至位於渣甸山畢拉山道嘅二千幾平方呎高級公務員宿舍，月租逾七萬元。早前貪曾已被發現經常一身背心「麻甩」打扮，同當晚嘅打扮如出一轍。