白鴿黨內訌不絕，好似佢哋近年力棒多名「乳鴿」上位嘅做法，引起唔少「老鴿」不滿，其中，中西區黨團老鴿阿King鄭麗琼疑因不滿黨中央「盲撐」外號「瘋鴿」嘅青年黨員許智峯，擔心最終會嚇走支持者，憤然辭任中西區黨團召集人，令該區黨團運作癱瘓近半年。

大約半年前，「瘋鴿」多次向黨中央投訴阿King等人拒絕配合其激進行動，後來有黨高層出面勸阿King支持班後生仔，阿King憤而辭任黨團召集人，自此中西區黨團即未再開會，亦無重選召集人。阿King承認幾個月前已無做召集人，不過就否認同許智峯不和，聲稱「我幾多歲呀？我都唔鍾意嗌交」。佢又話該黨中西區剩低四名區議員，差唔多個個都係召集人，大家用WhatsApp溝通都得喎，句句有骨。「瘋鴿」亦認同阿King曾有爭執，但唔覺佢係因此而辭任召集人。

聽聞有老鴿揚言，若明年立法會換屆後，乳鴿全面掌握白鴿黨港島支部嘅話，一批老鴿隨時發起另類不合作運動，最壞嘅情況就係集體退黨喎。