公屋輪候創新高 上樓等到頸都長

點解太一叮忽然提起長頸鹿？係咁嘅，房委會數字顯示，截至今年六月底，輪候公屋宗數已經突破二十八萬大關，創出歷史新高，其中十四萬宗一般申請，平均輪候時間由今年三月底嘅三點三年拉長至三點四年；非長者一人申請亦超過十四萬宗，直情望到頸都長，再咁落去，遲早齊齊變成長頸鹿嘅咋。

公屋爭崩頭，居屋亦唔好得幾多。房委會早前推出二千個居屋單位，總共收到十萬份申請，一百四十幾個白表申請者爭一個單位，仲難過中六合彩咁滯。

正所謂，有頭髮冇人想做瘌痢，如果唔係私人樓宇售價長升長有，公屋同居屋又點會咁搶手吖。嗱，差餉物業估價署最新數據顯示，私人住宅樓價指數連升三個月，按年急升兩成，創下歷史新高。至於租金升幅同樣驚人，連升十六個月之餘，按年亦升咗一成，同樣成為歷史新高。

以上幾組數字表面睇好似唔相關，其實都反映同一個事實，就係房屋問題積重難返。私人樓價高不可攀，遠遠超過一般家庭負擔能力，愈來愈多人被迫申請公屋，搞到輪候時間愈拉愈長，所謂三年上樓嘅承諾早就淪為空談。尤其對於非長者單身人士嚟講，申請公屋簡直仲難過登天。

公屋輪唔到，私樓買唔起，無殼蝸牛兩頭唔到岸，你話點算呢？特別係基層人士，唔理好醜，但求就手，鐵皮屋、貨櫃、雞欄甚至豬欄改建嘅劏房固然搶手，連上格住人下格廁所嘅籠屋都唔放過，都咪話唔悲哀。

房屋問題之所以愈演愈烈，講到底都係因為前朝貪曾政府埋下禍根。曾蔭權爵士無所作為，坐視房屋問題不斷惡化，現屆政府雖然有心撥亂反正，可惜無力回天，話就話將解決房屋問題列為施政重中之重，可惜講就天下無敵，做就無能為力，覓地建屋阻力重重，又點樣解決房屋問題吖？

點都好喇，公屋輪候大排長龍，無殼蝸牛望天打卦，唔到當局卸責。港府早排係威係勢推出建屋目標，話要喺十年內興建四十八萬個住宅單住，其中公營房屋二十九萬個，如果又係吹水唔抹嘴，盞進一步激化矛盾嘅咋，叮！