邊境沙頭角禁區唔止充滿鄉郊小城特色，仲有唔少歷史建築。由教育學院同新巴城巴攜手主辦嘅社區藝術計劃，早前招呼約七十名市民乘坐由著名漫畫家草日設計嘅藝術巴士，浩浩蕩蕩開入禁區。保安局前局長李少光兒子李霖恩充當導賞員，沿途介紹沙頭角禁區嘅歷史故事、鄉土風情，隨團嘅仲有民政事務局副局長許曉暉。

李霖恩喺巴士上沿途介紹沙頭角禁區景色及歷史。（受訪者提供）

許曉暉（中）同團友喺沙頭角公眾碼頭拍照留念。（受訪者提供）

自從兩星期前突然發生兩位局長被炒魷魚事件後，盛傳因兩度「上位」無望而無心戀棧嘅許曉暉，一直未公開現身，只係喺社交網站交代會輔助新局長劉江華做好無縫交接。唔通佢真係無晒心機，寧願到遠離政治核心嘅邊境禁區散吓心好過？