話說城市女青年商會早前舉辦第五屆全港時尚專業女性選舉，得獎者包括香港僑界社團聯會主席陳有慶孫女Stephanie陳曉鈴同香港島婦女聯會主席張雅麗等。Stephanie話港人物質生活豐富，好多嘢得來太易，冇諗過食物來源珍貴，成日浪費食物，故佢引入社企改善有關問題。

陳曉鈴（左）獲爸爸陳智文陪伴撐場。

陳章明話現時好多長者都受過高等教育，唔係負累。

何倍倩（左）同其提名人何國鉦（右）最近都忙住搵學校。

Stephanie十幾年前喺阿叔行政會議成員陳智思介紹下，認識安老事務委員會主席陳章明，即係佢參加今次選舉嘅提名人。陳章明認為長者喺社會上容易畀人負面感覺，但其實依家好多長者都受過高等教育，有條件過高質素嘅退休生活。四年前陳曉鈴留學返港後，就諗到開設「永健坊」呢個同時提供進修同休閒享受嘅長者生活空間，又引入日本社企捐助窮困或有需要嘅兒童。

何倍倩為子叩門忙爆

對於時下好多年輕人都鍾意篤手機，Stephanie就話好珍惜家庭聚會時間，食飯時唔使爸爸出聲，都自動自覺會擺低部手機。相反陳章明就大呻要以WhatsApp先可以搵到個仔，又試過難得一齊食飯，卻各自做「低頭族」，搞到佢忍唔住出聲話：「不如你哋聽吓老竇講嘢啦！」

同場仲有去年得獎者名媛Anina何倍倩同其提名人時裝設計師何國鉦。Anina話早前忙住幫個仔搵小學，前前後後一共去咗十幾間學校面試，其中一間仲要見四次咁多，連老公都忍唔住講笑話自己見工都未試過見咁多間。而身旁嘅何國鉦雖未有仔女，但就有好多朋友託佢幫手搵學校，因為佢早前幫母校培正做校慶籌委，好多朋友得知佢係培正校友後，電話就開始響個不停喎。