祖國有成十四億人，需求郁一郁，影響都好大。好似近排中國製造業轉弱，全球商品價格包括油、金、銅乜都大跌；但有樣嘢例外，仲無懼世事變改愈嚟愈貴，講緊嘅係龍蝦。講明，係龍蝦，唔係呢排話食多咗會肌溶嗰啲小龍蝦。

中國人嗜食龍蝦，話係中產身份象徵，可惜本土無龍蝦業，要靠澳洲同美加進口，美國舊年出口龍蝦到中國嘅數量係○九年嘅二十二倍，齋今年都升咗百分之十二。依家每星期就有成六萬隻鮮龍蝦，山長水遠由美加搭飛機嚟亞洲，排住隊等畀中國人啅，浩瀚過閱兵。

多得中國人胃口大，加上美加今年勁凍，龍蝦產量少咗，搞到上月底加拿大龍蝦鉗肉價升上歷史新高，批發價去過每磅一百八十港元！聽聞連淘寶都有得賣，龍蝦真係多得中國唔少。