台灣八仙水上樂園早前發生塵爆事件後，到當地探望港人傷者嘅八仙嶺山火幸存者張潤衡，一度被網民批評「做騷」，又質疑佢當年吸煙引致山火，引發一場網絡審判，其後衡仔仲辭任香港灼傷互助會副主席一職。事隔一個月，佢就用行動證明畀大家睇，事件絕對冇動搖佢關懷弱勢社群嘅心志。

張潤衡（左）親身探訪梁翠嬋（中）一家。

衡仔早前被邀做電視節目嘅嘉賓主持，唔係齋噏嗰種，而係親身走入劏房。佢探訪咗一個住喺一百呎劏房嘅四口家庭，四十歲嘅梁翠嬋同任職地盤散工嘅丈夫，育有兩個仔分別二十三歲同八歲，大仔患有中度智障，而細仔智力正常。

了解過梁翠嬋嘅生活後，衡仔分享自身經歷，鼓勵佢即使面對逆境仍要勇敢堅毅生存。為體驗梁翠嬋嘅生活，衡仔仲同佢一齊走到街上派傳單，又陪佢利用節目畀嘅一萬元買禮物畀家人。梁選購禮物時嘅細心充滿佢對兒子同丈夫嘅關愛，令育有一女嘅衡仔倍覺感動。

最後，衡仔同梁翠嬋喺幾位企業嘉賓中，揀咗從事食肆嘅黎偉鴻一齊食飯。衡仔希望透過呢次相聚，為梁翠嬋搵到一份全職嘅工作，改善家庭經濟。