國際巨型企業嘅舵手，重任係幫公司賺錢，公司梗要保佢哋條命仔平安。呢啲巨企每年用咗幾多錢喺舵手嘅保安上？保安費使得至抵嘅，應該係蘋果公司，佢哋教主庫克幫公司一年賺成五百幾億美元，但用喺佢身上嘅保安費，都唔使七十萬美元，超抵。

股神巴菲特嘅保安費一貫好慳家。（資料圖片）

貝索斯嘅保安費夠晒豪，每年使逾160萬美元。（資料圖片）

至豪嘅係亞馬遜，佢哋用喺CEO貝索斯身上嘅保安費，每年超過一百六十萬美元；點解咁貴？佢哋話因為貝索斯人工低，得嗰八萬一千美元兼無股份補償喎。甲骨文亦一樣，話主席埃利森唔計認股權，人工只係收一蚊美元，所以要闊佬啲用一百五十萬美元嚟保護佢。乜人工「低」同保安有關係嘅咩？真係睇唔出喎。

股神巴菲特就一貫咁慳家，佢用車唔入公司數，用公司飛機亦只限公事用，佢雖則係全世界第三最有錢嗰個，但保安費都只係花公司三十六萬幾美元！