香港大學副校長委任風波愈演愈烈，上周二學生因為不滿校委會「等埋首副校長」嘅決定，衝入會議室搞佔領兼禁錮校委事件，引來軒然大波。當日唔少校委都喺衝突中受傷，李國章唔單止被學生禁錮，仲自稱離開會議室時右邊腎被打一拳；而盧寵茂醫生就被踢傷腳部舊患，要留院幾日；連劉麥家軒都被圍困近一小時，最後身體不適送院。不過，竟然有校委安然無恙，皆因喺外地旅遊，風流快活！

喺學生衝入會議室搞佔領兼禁錮校委事件當日，石禮謙正暢遊歐洲。（資料圖片）

我哋發現校委之一嘅經民聯立法會議員「大舊石」石禮謙當日冇去開會，原來同另一經民聯議員林健鋒結伴暢遊歐洲，歎美酒佳餚，風波過咗近一星期先至返香港，真係外遊得相當合時。今次就可以話估唔到校委會會議會發生咁大件事，所以去咗歐遊，但如果港大校委會本月底再開會時都唔見大舊石，就好明顯佢係為咗避風頭喇！不過，港大學生會會長馮敬恩都話考慮唔再衝擊校委會會議，大舊石到時現身都唔使驚啦！