歷時七十九日嘅佔領行動喺舊年十二月以清場告終，領導整個行動嘅香港專上學生聯會因喺事件中進退失據，不單畀各方譴責，仲失去學生支持，至多間大專院校退聯。正當呢個風雨飄搖之際，曾代表學界同政府高官談判嘅學聯五子，包括前秘書長周永康、前副秘書長岑敖暉、前常委梁麗幗同鍾耀華，竟然完全放手唔理學聯事務，拍拖嘅拍拖、返學嘅返學，由得現任秘書長羅冠聰自生自滅。

忙拍拖抓銀 剩「羅三七」死撐

自佔領行動後，學聯領軍人物幾乎絕迹政界。一早講明會重返校園生活嘅周永康，完全無喺學聯活動中亮相。雖然岑敖暉都會去吓六四晚會同七一遊行，但都好低調，除咗間中喺社交網站見佢同女友何潔泓攬到實一實晒恩愛外，都鮮有評論政治，對學聯佢梗係愛理不理啦！

本身係港大校務委員會成員嘅梁麗幗，近日校委風波後先現身公開場合，但事件令佢一頭煙，睇嚟佢都唔會點理學聯事務喇！其實仲喺中大讀緊書、延遲咗兩年都未畢業嘅鍾耀華應該係最得閒嘅一個，但據聞佢竟然走咗去新媒體做記者搵外快，書未讀得掂，仲分心搵錢，莫講話理學聯，真係畢唔畢到業都成問題呀！

學聯四名「老鬼」愛理不理，相反以三十七票當選秘書長嘅羅冠聰政治能量又唔夠，經常都被人謔稱「羅三七」，學聯到依家可以話係潰不成軍，恐怕摺埋都係遲早嘅事喇！