呢排電話騙案急增，騙徒好猖獗，唔少政界人士都收到詐騙電話。本身係安徽省政協委員嘅立法會議員Ben陳恒鑌，早前都收過詐騙電話，對方聲稱自己係安徽省政協秘書長，話近日頻頻嚟香港交流「使大咗」，想問吓阿Ben可唔可以幫手填番個缺口，仲話想升佢做政協常委咁話。但阿Ben一聽到對方提到錢銀即刻醒水，婉轉咁收咗對方線，冇做「水魚」。

阿Ben話當日收到呢個詐騙電話時，對方稱自己係安徽省政協秘書長，一開口就話想升佢做常委，仲懶熟咁問候佢嘅助手。因為阿Ben冇同安徽省政協秘書長傾過電話，所以根本唔知真偽，惟有禮貌咁問句，有乜嘢可以幫到手呢？對方一聽到呢句，就露出狐狸尾巴，話因為最近成日招待啲人嚟香港交流，所以用多咗錢，有個「缺口」，問阿Ben可唔可以幫手，換言之即係叫佢科水填氹囉！

對方一提到錢，阿Ben就知對方應該係騙徒，所以就叫對方留低聯絡電話，話之後再覆對方，對方於是就留低電話兼收線。阿Ben再打番對方留低嘅電話號碼，但就發現係空號嚟嘅。似乎對方係諗住以升官利誘阿Ben，如果對名利好着緊嘅人，相信好大機會上當。

下周會粵公安廳商討

鑑於近來電話詐騙愈來愈猖獗，阿Ben尋日就同黨友就電話騙案問題同保安局局長黎棟國見面。佢哋仲引述政府數字，話單係七月已經有八百幾宗假冒內地官員嘅電話騙案，佔今年頭七個月約八成。阿Ben話依家騙徒嘅手法層出不窮，唔少詐騙電話都係由內地致電香港，佢哋都收到唔少求助個案。該黨下周會去同廣東省公安廳官員見面，商討點樣可以加強兩地合作，打擊騙案。