其實政府「價低者得」嘅招標政策一直為人詬病，除咗影響受聘員工嘅待遇同產品質素，最直接嘅影響就係做爛市。好似香港軟件行業協會會長Eric楊全盛，最近就因為九毫九輸咗單政府工程，真係唔知好嬲定好笑。

楊全盛出價投標政府工程，只係差九毫九就輸咗。（資料圖片）

政府早前就電子文件管理系統工程進行招標，底價係一百四十萬元，Eric出價一百四十萬零一元，本來坐定粒六，諗住實中標，點知竟然有人出價一百四十萬零一仙，最終Eric以九毫九之差失落呢單工程。佢話最激氣嘅地方係呢間唔係本地公司，但竟然都知道呢個玩法。至於中標公司點樣畀一仙出嚟？佢話透過支票或銀行過數都得，笑言真係畀現金都唔知點找錢。