名人Niki周麗淇日前喺內地出席「星空醫療.芭莎公益慈善基金」慈善拍賣晚宴,為幫助當地籌得更多善款,以購買醫療用品同設備幫助內地居民,Niki捐出一隻相當有紀念價值嘅金戒指畀大會拍賣,係年前同某品牌合作,由佢悉心設計嘅限量版金戒指。

Niki(右)拍賣金戒指籌款,購置一輛山區用嘅救護車。

當晚在場嘅善長仁翁對Niki設計嘅金戒指反應相當熱烈,踴躍競投,最後以二萬元人民幣高價成交,而籌得嘅善款將會用嚟購置一輛山區用嘅救護車,救助住喺內地山區嘅貧苦居民,讓山區嘅居民能喺第一時間送到醫院接受醫治,Niki捐贈嘅救護車,車身將會印上「周麗淇捐贈」嘅字樣,而之前內地紅星胡兵亦曾為山區嘅居民捐贈咗一輛救護車。