為咗推廣港式奶茶呢項香港嘅地道文化，香港咖啡紅茶協會就搞咗個金茶王流動奶茶車活動，由尋日起，一連五日出動流動奶茶車喺本港各區向市民免費派發港式奶茶。香港咖啡紅茶協會主席黃家和就話，佢一出世就同奶茶結下不解之緣，覺得一杯好奶茶一定要茶味夠濃，飲落去要夠滑，希望宣揚港式奶茶文化，令港式奶茶有朝一日成為非物質文化遺產。

黃家和（右二）話同奶茶有不解之緣，旁為廠商會副會長吳永嘉（右一）及陳淑玲（右三）。

香港咖啡紅茶協會搞咗個金茶王流動奶茶車活動，免費派發奶茶。

王詩雅（左）同周雯玲都有品嘗流動奶茶車派發嘅奶茶。

呢架流動奶茶車尋日就喺港島鰂魚涌向市民大派奶茶，仲有歷屆「金茶王」沖奶茶比賽嘅得獎者即場表演。黃家和就話因為屋企係做咖啡奶茶生意，所以一出世已同奶茶結下不解之緣。佢又話協會過去七年都喺香港推廣港式奶茶文化，希望有一日港式奶茶成為非物質文化遺產，打入內地甚至海外市場。

周雯玲奶茶當早餐

中華廠商聯合會青委會名譽主席周雯玲尋日都有捧場。佢話以前鍾意飲咖啡，但就怕攝取太多咖啡因而影響健康，所以戒咗咖啡一年，改飲感覺上好似少啲咖啡因嘅奶茶，點知愈飲愈上癮，每朝都係飲奶茶當早餐。

而屋企做茶葉生意嘅廠商會青委會副主席王詩雅就話鍾意飲奶茶多過咖啡，係因為奶茶冇咖啡嘅苦澀味。佢透露十月會考國際品茶師資格，但所「品」嘅唔係奶茶，而係中國茶。佢話修讀品茶師課程，一半係因為自小對茶有興趣，而另一半係為咗屋企生意而自我增值。