東江縱隊港九獨立大隊係抗日戰爭期間,活躍於香港嘅武裝組織,但呢支游擊隊對於保衞香港有幾大貢獻,就未必人人曉得。有歷史研究會出版一本講述東江縱隊嘅書籍,期望市民對香港淪陷嘅歷史有較深入嘅認識。出席新書發布會嘅新社聯立法會議員梁志祥話,雖然民間組織好努力搜羅相關資料,輯錄成書,但鑑於香港係中國抗戰歷史中嘅重要部分,因此政府有必要設立博物館,以硬件形式保存呢段歷史。

梁志祥(左四)等議員同當年嘅東江縱隊老戰士一齊出席新書發布會。

立法會漁農界議員何俊賢就話,自小就聽到曾屬東江縱隊嘅漁民,講述拯救抗日人員嘅驚險故事。但礙於東江縱隊嘅成員多數係文盲,唔識得用文字嚟記述自己嘅親身經歷,所以將東江縱隊當年嘅活動載入史冊,實在刻不容緩。佢又話內地近年流行抗日神劇,雖然其誇張情節惹來譏笑,但有部分劇情的確係源於真實歷史背景。至於北區區議員陳勇就話本土派搞排外抗爭之前,宜先讀歷史搞清楚邊個至係「本土」喎。