舊年底歷時七十九日嘅佔領行動,對香港影響深遠,除咗打殘香港嘅法治根基,連立法會議員同議員助理要求增加津貼以及薪酬嘅大計亦受拖累。立法會轄下委員會早喺幾年前建議,將議員酬金同問責局長薪酬掛鈎,同埋將議員助理薪酬與公務員薪級表掛鈎,其中前者好快就喺強烈嘅民意反對下被打殘,而後者至今則仍在爭取中。

不過,近日曝光嘅公文袋立法會議員「阿毛」毛孟靜涉嫌用立法會津貼購買發電機同帳篷等佔中物資醜聞,以及多名泛民主派議員助理喺「全職佔中」期間,照用公帑支取全薪事件,變相將大幅調高議員助理薪津方案宣判死刑。最慘嘅係一批與佔中無關嘅建制派議員助理,無辜被泛民拖累,大幅加薪無望,自然埋怨阿毛累街坊。

何秀蘭被斥剋扣助理人工

最搞笑嘅係,唯一有助理「瞓身」佔中、而自律地只向立法會申領一半議助薪酬津貼嘅工黨議員何秀蘭,竟反過來被其他參與非法佔中嘅議員助理,質疑佢剋扣助理人工。何秀蘭其後要急急出稿澄清,指涉事助理人工其實並無減少,另一半薪酬最後係由工黨支付。眾所周知,壹傳媒集團前主席「肥佬黎」黎智英係工黨嘅最大金主,肥佬黎出錢資助違法佔中,因為今次事件而又多披露一例嘞!

其實,立法會相關嘅委員會早前都有討論議員助理嘅薪酬問題,工黨嘅議員李卓人同白鴿黨嘅劉慧卿喺會後再次重申議助嘅薪酬應該同公務員薪酬掛鈎,而一班泛民嘅議員助理仲喺立法會門外拉起橫額請願,話議員助理人工低,流失率高。但係睇嚟佢哋點嗌都冇用,事關睇到班泛民議員點樣濫用公帑,而一班泛民議員助理點樣「不務正業」,試問邊有加薪嘅理據呀!