恒生銀行喺「一姐」副董事長兼行政總裁李慧敏（Rose）帶領下，上半年業績省鏡，但一姐謙虛咁話：「唔係我哋一班長者（恒生高級管理層平均年齡頗高）嘅功勞。」早前先用三點七五億天價，買咗以螺旋型設計聞名嘅OPUS單位嘅Rose係懂得生活嘅人，平時愛品茗，得閒就北上搜羅靚茶葉同茶壺，所以佢幾時都要有張回鄉卡帶喺身。

今年六十二歲嘅Rose任恒生執董嘅三年任期，本來喺今年五月已經屆滿，但佢似乎未打算退下火線，仲有唔少恒生發展大計添，就好似尋日咁，Rose就不時提到話，唔派特別息係為咗「長遠」嘅發展，佢仲話「我哋家教唔係有錢就要飄飄然嘅」。

睇番佢嘅戰績，七七年已經加入滙豐旗下獲多利企業金融部，喺集團服務足足三十四年，素有「中國通」之稱。二○○八年再升任滙豐環球銀行業務中國及香港主管，雖然之後處於半退休狀態，改任滙豐中港區顧問，但後來「復出」接棒，以退休之齡空降恒生做「一姐」，睇嚟佢一啲都唔介意搏殺多幾年。