諾貝爾經濟學獎得主克魯格曼（Paul Krugman）一向惹火，時不時發炮攻擊呢個嗰個，近排，佢又睇唔過眼法國經濟學家皮凱蒂（Thomas Piketty）本新書《The Economics of Inequality》，再度發炮。

皮凱蒂舊年本《二十一世紀資本論》（Capital in the Twenty-First Century）一出，即刻喺亞馬遜賣斷市，今年乘勝追擊出新書。點知克魯格曼踩呢本書一啲都唔「新」，話皮凱蒂只係翻炒○一年發表嘅文章，只係改咗少少，而且書中唔少地方仲用九五年之前嘅數據。克魯格曼仲話，如果啲讀者當新嘢睇，仲差過唔睇，又話佢實會同皮凱蒂拗落去。

皮凱蒂受唔受克魯格曼挑機？未知喎。不過克魯格曼周圍辣火頭，實在太深入民心，難怪前排畀人惡搞成八十年代街機嘅主角，仲同瑞典央行副總裁Per Jansson、英國財相歐思邦等人隻揪。最後邊個贏？街機克魯格曼話係自己喎。