政改方案喺建制派離場「甩轆」下以大比數被否決，幾位「甩轆」關鍵人物被指元兇，佢哋嘅政壇前途會唔會受影響呢？香港術數家協會術數師楊子東批算，民建聯幾名議員嘅運勢都好不濟，前主席譚耀宗（譚Sir）等運勢轉差，建制派「班長」嘅民建聯（民記）葉國謙運勢會轉弱，明年更可能會「玩完」！而年初喺車公廟被舞麒麟撞飛嘅新民黨葉劉淑儀，即使事後哭成淚人，博得同情，但立秋後運勢同樣走下坡，有志難伸，明年更差。

楊子東批算又指，當日拉隊離場的核心人物經民聯議員林健鋒（Jeffrey）運勢有好轉迹象，唔使太擔心，本周六就係立秋，建仔多位成員流年都相當不利，好似前主席譚耀宗（譚Sir）同現任主席李慧琼（Starry）都被批明年運勢會轉差。其中譚Sir今年運勢已經勉勉強強，立秋之後更轉向唔吉利，預計明年會急轉直下。而身兼行政會議成員嘅Starry，農曆九月將會面對好大壓力，明年運勢亦都轉差。

至於留守會議廳同泛民主派一齊投票嘅自由黨田北俊，楊師傅話佢犯「三刑」，口舌招尤，九月不吉利，明年將會更差。此外被指在「甩轆」事件中參與建制派WhatsApp群組有違中立嘅建仔立法會主席曾鈺成，立秋後反而會轉順，農曆九月更加大旺，明年運勢亦可。風水嘅嘢信則有、不信則無，又睇吓呢班政圈中人嘅運勢點樣發展。