近期假冒速遞公司及中聯辦嘅電話騙案急升，唔少市民都收到呢類詐騙電話，甚至中招受騙。不過，原來最受呢類詐騙電話困擾嘅可以講係香港一班人大代表同政協委員，皆因佢哋當中亦都有唔少人收過呢類詐騙電話，加上佢哋經常都要同內地及中聯辦聯繫，真係好容易中招，幸好佢哋都有渠道同中聯辦人員核實，否則就認真麻煩。好似身兼金融界立法會議員嘅吳亮星（星爺）就話，佢已經收過兩、三個冒認係中聯辦打畀佢嘅電話喇，不過就冇中招啫。

其實對一般人嚟講好少會收到中聯辦電話或由中聯辦寄來嘅包裹，不過作為人大政協，就成日都會同內地及中聯辦聯繫，如果有相關活動，中聯辦都會通知佢哋，所以佢哋收到中聯辦嘅電話可以話一啲都唔出奇。有港區人大代表就話，近期咁多冒認中聯辦嘅詐騙電話，就連一班港區人大代表都收到唔少，搞到佢哋一收到聲稱係中聯辦打嚟嘅電話都要小心，甚至要向中聯辦人員核實。

星爺曾接兩三個

不過，星爺就話雖然收過兩、三個冒認係中聯辦打畀佢嘅電話，但因為聽落似係電話錄音，加上對方竟然會讀出中聯辦全名，所以佢未聽對方講完就收線。星爺又話，中聯辦有專門同人大代表聯絡嘅人員，所以一聽唔係嗰位人員把聲，都已經知係有古怪喇。

而同樣都係人大代表嘅體育、演藝、文化及出版界立法會議員馬逢國就話，佢過往都有收到「猜猜我是誰」之類嘅詐騙電話，但冒認中聯辦嘅電話就暫時冇喇。佢話一班人大代表已經互相提醒，相信作為人大應該都冇咁易上當。而港區人大代表、東區區議員蔡素玉就話，其實佢哋好少會收到中聯辦信件或包裹，因為一般由特定中聯辦人員聯絡佢哋，所以如果一有呢啲聲稱係速遞公司嘅電話，都可以收線咁話喎。