大集團話摺就摺 競爭力剩得幾多

太一叮講緊嘅，之唔係尋日結業嘅大型傢俬家電連鎖店囉。集團創辦人兩夫妻九七年憑十萬蚊本錢開第一間舖，開創一站式傢俬家電直銷中心嘅先河，由六百呎樓上舖發展到高峰期擁有十八間分店，遍布港九新界，分店總面積高達七十萬平方呎，員工近千人，咁威水嘅大集團話摺就摺，都咪話唔唏噓。

話時話，集團關門大吉，其實早就有迹可尋。今年以來佢哋相繼傳出拖欠外判運輸商服務費，以及被業主追租等負面新聞，外界已經判斷命不久矣。嗱，實際「死因」係乜，太一叮唔係企業醫生，唔夠膽妄下判斷，但有一樣嘢可以肯定，香港營商環境不斷惡化，淨係租魔肆虐，已經唔係人人捱得住，再加上百物騰貴，燈油火蠟水電煤、伙記人工、原料等成本無不節節上升，莫講話單打獨鬥嘅小店執吓一間執吓一間，好多大集團一樣頂唔順嘅咋！

香港營商環境有幾惡劣，只要睇吓世銀舊年發表嘅研究報告，老對手新加坡連續九年位列全球第一，香港嘅排位就跌跌不休。所以話啫，往事只能回味，今時今日想憑十萬蚊創業興家？發夢冇咁早。

當然啦，香港經濟前景隱憂重重，又點止營商環境惡劣咁簡單吖。係人都知，香港經濟結構單調，缺乏新增長點，要科研冇科研，要實業冇實業，除咗四大支柱嘅金融仲叫做撐得吓，就剩番消費一瓣。你知喇，內部消費始終係塘水滾塘魚，貢獻有限，而外部消費主力軍嘅內地客又買少見少，你話唔閉翳就假嘅。正所謂，覆巢之下無完卵，作為一個開放經濟體，外圍打個乞嗤，香港當堂感冒，家陣美國又話加息，內地又話經濟放緩，有人警告，一場比金融海嘯更厲害嘅經濟危機已殺到埋身，唔係危言聳聽。

最攞命嘅係，有啲人身處險境仲喺度懵盛盛，一味掛住政治鬥爭，內鬥內耗，經濟民生問題不屑一顧，再咁落去，遲早自己玩死自己。

諗諗吓，大型傢俬家電連鎖店同特區係「同齡人」，由盛轉衰，到依家終於走進歷史，唔通呢個就係香港命運嘅縮影？叮！