城中鏡：Greg騷寸爆政局
香港工業總會早前舉行換屆暨周年晚宴，由做環保生意嘅正昌集團主席Daniel鄭文聰接替劉展灝做新主席。近排放長假嘅商務及經濟發展局局長Greg蘇錦樑突然返工一日，原來夜晚應承出席工總晚宴夾Band做騷，佢一上台就同Daniel搞爛Gag，寸盡政壇熱爆嘅炒局長風波同政改投票「甩轆」事件，唔知係咪乘機發洩外傳佢一度被列炒魷名單嘅不忿呢？
蘇錦樑（左）彈結他同鄭文聰高歌前，寸爆政局熱話。
將接替蘇家碧（右）做工總總裁嘅何健華（左）都有出席晚宴。
劉展灝（左三）獲太太梁淑賢（右三）率大仔劉燊濤夫婦（左一及二）、細仔劉燊霆同女友Cristo齊撐場。
阿Greg首先恭喜Daniel榮任主席，話口未完就問劉展灝係咪樂意退任㗎？Daniel話梗係喇，事關劉展灝平步青雲做咗生產力促進局主席喎！阿Greg隨即撩做環保生意嘅Daniel擔任全城清潔行動大隊長，因為做隊長都幾平步青雲，暗諷統籌全城清潔嘅政務司司長林鄭月娥，好在當時林鄭已離場，聽唔到佢亂咁噏嘢。
劉展灝剩大把未完任務
最後阿Greg仲藉機澄清，話最近流行有啲咩動物（豬）嘅隊友，其實唔係講緊佢，因為佢屬狗，狗係好得人鍾意嘅，仲話好感謝劉展灝話一旦佢被炒魷，會考慮收留佢喎！查實劉展灝都卸任啦，係都搵新主席Daniel收留佢啦！
公職多多嘅劉展灝係城中大忙人，卸下工總主席後都冇得抖吓，旋即接任生產力促進局主席。佢笑言工總仲有好多未完嘅任務有待Daniel跟進，至於係乜就有排數喎。不過，Daniel早就心中有數，一上任就發表大計為業界爭取更好嘅營商環境。至於八月下旬先返工嘅工總候任總裁何健華當晚都有現身，佢笑稱好期待，有信心勝任新工喎。
