十一月底就係區議會換屆選舉,有意參選嘅社區幹事都絞盡腦汁宣傳,尋日有讀者報料,話建仔嘅中西區社區幹事楊學明喺西環水街行人路擺自己嘅人形紙板,紙板紀錄地區工作同寫上「梗有一刻喺左近」。本來個人宣傳冇乜嘢,但現場所見足足擺咗約二十個人形紙板,每個成五呎五吋高,好似真人排晒隊咁。有街坊就抵唔住頸報警,話佢呢啲人形紙板勁阻街,警察到場後,楊只好將啲紙板收走。

楊學明嘅人形紙板喺西環水街行人路排晒隊,被街坊報警投訴佢阻街。(讀者提供)

楊學明話呢啲紙板只係佔行人路六分之一,阻街與否見仁見智喎。又話紙板合共要三千元,一次過展示出來,係為咗顯示呢幾年該區爆水喉好離譜,希望街坊對此印象深刻,但佢承認既想宣傳爆水喉,亦想自我宣傳。其實佢喺四年前區選已喺水街選區挑戰白鴿黨黃堅成,但以一百票左右落敗。據知黃堅成今年退休,由新人伍凱欣接棒,唔知楊學明係咪想趁機搏到盡,務求搶得議席呢?