上星期五雅虎宣布收購網購平台Polyvore，但如果雅虎CEO邁耶十幾年前無同Polyvore個靚女CEO Jess Lee講過一番話，今日單Deal未必會出現。點解嘅？

雅虎邁耶（圖）

Polyvore個CEO Jess Lee（圖）聽晒雅虎邁耶當年教落，至有今日。

話說Jess喺○四年畢業後一心打算做工程師，但喺應承軟件公司Intuit個Offer前收到谷歌電話，原來谷歌睇咗佢份CV，覺得佢好啱加入產品經理培訓計劃。Jess原本十五十六，不過邁耶當時咁同佢講：「有得揀，應該揀條睇落難行啲嘅路，因為多數會揀啱」，結果Jess決定入谷歌，仲參與研發Google Map。

不過，到○八年Jess又企喺十字路口，原來佢寫咗封投訴信畀當時成立咗一年左右嘅Polyvore，點知Polyvore竟然開聲叫佢過檔幫手解決問題。由國際巨企去間蚊型公司真係需要好大勇氣，但全靠邁耶嗰番話，Jess決定接受挑戰，仲喺一二年做埋Polyvore CEO。

揀路行，十個有九個都會揀條易嘅，若你係第十個又唔係被迫嘅，恭喜你，夠膽向虎山行，多數有前途。