星級分析員陸東出咗名測市準，好多人直頭封佢做偶像，有機會都想撲埋去請佢指點吓迷津。喺佢金融生涯中無食過檸檬？未必。佢尋日喺清談節目上自爆，去o偽人都冇人想見佢，佢試過。陸東話做iBanker嘅，自己嘅獨到分析最後證實係啱嘅就最開心，但咁談唔上係成功。但講到最有滿足感，要數佢做瑞銀時搞中銀香港同領匯上市，尤其係中銀香港嗰次。

陸東好支持聖雅各福群會嘅陶藝推廣，話呢啲自閉或智障人士做出嚟嘅陶公仔，既有細路童真，亦有靈氣。（資料圖片）

話說○二年市況好差，陸東當時要走遍全世界去做Roadshow推介中銀香港股份，「去到歐洲美洲，o偽人見，都冇乜人想見你，香港周街都係負資產，做乜要買間銀行。」佢又話：「不過，最後肯落疊嘅客人，都係多謝我哋。」即係佢「點」條正路人行，啲投資建議堅囉！

陸東出名愛龜，卡片有龜嘜，網民直頭稱佢「龜仙人」。佢同龜結緣，原來早喺幼稚園，之後佢愈養愈多，依家屋企花園仲特登挖個龜池，養咗幾十隻添！講到慈善，佢話自己係社會上比較好彩嘅一群，去幫啲冇咁好彩嘅，係天公地道。佢一直大力支持聖雅各福群會嘅陶藝推廣，佢話呢啲自閉或智障人士做出嚟嘅陶公仔，既有細路童真，亦有靈氣。