話說香港大學副校長任命風波，演變成學生衝擊同佔領校委會會議、禁錮校委事件，校委之一嘅盧寵茂仲喺混亂中受傷送院。有校委指校委會一早夠票否決任命法律學院前院長陳文敏擔任副校長，但係喺年底退休嘅校委會主席「金刀梁」梁智鴻一直想拖延，唔想喺佢任內做決定，先造成依家嘅亂局同困局。唔少委員認為金刀梁一定要「啃埋佢」至好走，唔可以留畀下任主席孭鑊。

校委質疑交波畀下任主席

港大校委會早前以「等埋首席副校長」為理由，遲遲未決定係咪任命陳文敏做副校長。有委員稱校委會根本夠票否決，只係在於夠唔夠膽早啲投票，因為過往校委會好少唔通過遴選委員會嘅決定。有委員話早喺校委會討論審核委員會對佔中秘密捐款嘅調查結果時，就應該否決任命陳文敏，認為最終否決嗰陣都係要被人鬧，不如一次過鬧晒佢，免除後患，即係叫金刀梁早應審時度勢做適當決定。

有委員就質疑，金刀梁年底即將退休，不斷延遲任命副校長決定，係想將個波交畀下任主席，自己就能夠全身而退，而「等埋首席副校長」根本冇意義，仲令到事件愈鬧愈大。任命風波如今搞出個大頭佛，校委會都好難搵人接任主席。之前盛傳委員李國章將會接任，但亦有人擔心佢嘅強硬作風會引起反感；亦有傳曾搵過嶺南大學校董會前主席陳智思接任，但有指嶺大選校長嗰陣都搞到滿城風雨，嚇到佢驚咗唔敢做。

無論最終搵邊個接任主席，一嚟就硬食「副校長風波」，睇怕好難有人肯「捱義氣」喇！有委員就話延遲任命副校長冇問題，金刀梁最好做多一年，自己搞番掂壇「蘇州屎」先至好走。