表面睇嚟，行政會議成員楊偉雄同民政事務局副局長許曉暉，兩個大纜都扯唔埋，不過事有湊巧，楊、許二人喺官場仕途都曾經波折，前者被視為內定嘅創新及科技局局長，但因立法會拉布繼續無了期等待；後者則前後兩次都「升呢」失敗，最近一次係無緣坐正局長，佢哋同病相憐皆與問責局長一職擦身而過。近月兩人再新增一個共通點，分別增持寫字樓單位同住宅物業，同樣由另一半持有，莫非係睇好樓市後勢？

皆為另一半持有

政府過去三年多次向立法會闖關設立創科局都觸礁而回，楊偉雄喺今年三月終獲政府「三料任命」，分別係行會非官守成員、特首創新及科技顧問，同埋創新及科技諮詢委員會主席，佢喺今年三月初向行會作利益申報時，已列明由老婆、其他親戚等持有多個住宅單位同店舖物業。

事隔三個月後，楊偉雄喺今年六月中又更新利益申報，今次新增申報由太太持有新界葵涌一個寫字樓物業，自此楊偉雄喺須予登記嘅個人利益中，無論住宅、店舖同寫字樓通通有齊，只係爭在未見申報持有車位啫！

至於原本持有東區住宅物業作出租用途嘅許曉暉，其利益申報喺四月中亦有更新，由其另一半持有南區住宅物業作自住用途。依家許曉暉同老公喺港島四個區議會嘅其中兩個都擁有住宅物業，只剩中西區、灣仔區未申報持有物業，唔知許曉暉將來再增持物業時，會唔會繼續優先喺港島區落腳，務求喺港島四個區議會都有根據地呢？