莊子曾經講過一個比喻︰有人將價值連城嘅夜明珠當波子射殺麻雀，貴物賤用，得不償失，畀人笑到面黃，「隨珠彈雀」呢句成語就係咁樣得嚟。咪以為只係寓言呀，現實中真係有人咁愚笨o架！

太一叮講緊嘅咪就係香港郵政囉。話說本地郵件拖欠郵資嘅問題存在多年，署方一直闊佬懶理，直到審計署出手調查至急急補鑊，抽調大量人手抽查信件，由平日處理五百封激增近三倍至一千九百件。以每間派遞局調配一至兩名郵務文員，每日OT三粒鐘，時薪二百元至二百五十元計，即係話每個月超時補水成百萬元。好嘞，花費大筆公帑，到底收番幾多欠款呢？香港郵政係咁講嘅。過去幾年平均處理十四萬件欠資郵件，每個月平均三萬元。大拿拿月燒百萬元，淨係追得三萬元，講得文雅啲就係隨珠彈雀，講得通俗啲直頭係妹仔大過主人婆。

有立法會議員就講得啱嘞，寄件人支付郵費不足，用公帑補貼已經夠荒謬，追回欠款仲要遠遠少於額外投入嘅公帑，簡直匪夷所思。

冇錯嘞，香港郵政追數不力，已經唔係一朝一夕嘅事。世界各地嘅郵政部門處理郵資不足嘅郵件，一係打回頭，一係拒絕寄送，唯獨香港郵政先向收件人追數，遭拒後至打回頭畀寄件人，費時失事之餘，對未付足郵費嘅寄件人亦毫無阻嚇力，拖欠郵資有乜法子唔愈演愈烈吖。

話時話，香港郵政管理混亂，問題多多，呢啲只係冰山一角咋。淨係「失信於民」事件，舊年就有七千三百宗，賠款高達二百幾萬元。最離譜嘅係，香港郵政近年生意淡薄，業績年年見紅，唔裁汰冗員不特止，反而維持龐大編制，結果搞到人浮於事，集體蛇王有之，冒領超時津貼有之，呢方面嘅開支，去年就二億元，納稅人真係多得佢哋唔少。

所以話，洗腳唔抹腳嘅官僚見得多，但好似郵政官僚咁敗家嘅，睇勻全世界都搵唔到第二個，再咁落去，金山銀山都唔夠佢哋敗家啦！

香港郵政做蛀米大蟲都算喇，不務正業，充當政治打手滋擾傳媒先至攞命。即使係委任顧問公司研究改革方案，都可以因為走數而被對方數臭，真係唔到你唔服。

正所謂：揚湯止沸，不如釜底抽薪。香港郵政爛到入心，港府繼續養癰遺患，盞齊齊冇運行嘅咋，叮！