香港雙職家庭多，大家聚頭，好自然會分享吓事業家庭兩兼顧嘅心得，尋日紫荊青年商會舉辦一個頒獎禮，表揚在職婦女及支持女性僱員嘅企業。婦女事務委員會主席劉靳麗娟及家庭議會主席石丹理都有到場，育有一對子女嘅石丹理話，太太返工時，佢必定將工作帶返屋企處理，以便睇住子女，令太太無後顧之憂。

劉靳麗娟（右）十分支持國際青年商會香港總會會長梁國柱活動。

本身係教授嘅石丹理，太太係一名社工，屋企雖有外傭幫手打理家頭細務，但佢同太太堅持唔將教導子女嘅工作假手他人，亦盡量避免父母同時缺席，寧願自己辛苦啲。劉靳麗娟就話，在職婦女面對嘅困難唔少，不過，動吓腦筋都可搵到解決方法，例如安排彈性上班時間，又或者設置哺乳室，至於劉太任教嘅中學就容許教職員每星期有半日時間處理私人事務。

事業與家庭並重嘅劉太坦言，平時同家人相處嘅時間唔夠工作時間長，因此好珍惜假日時間，早前佢就趁暑假同家人去日本玩咗十日，仲玩得好盡興。