尋日正義聯盟同撐警大聯盟發起「撐警一周年勝利大遊行」,引來熱血公民拉隊打對台,雙方一度爆發衝突。正義聯盟召集人李偲嫣再次出動「校服Look」,身穿格仔校服裙喺台上載歌載舞,又以新「唐三藏Look」演出話劇《黃屍毒》,寸爆前壹傳媒集團主席黎智英(肥佬黎),用「毒蘋果」散播劇毒。李偲嫣騎呢裝扮一出,熱血公民成員莫不愕然兼冇眼睇,大叫口號「人形豬」、「回水」贈興。

李偲嫣扮嘢扮上癮,扮完學生妹又扮唐僧。

李偲嫣扮嘢扮上癮,扮完學生妹又扮唐僧。

本土派一睇到劇場上演即刻呆晒。

約五十名撐警人士由遮打花園遊行至灣仔警察總部,然後再折返原地。回程時撞正熱血公民同本土力量成員,大家互不相讓,結果發生衝突,後來警方以涉嫌襲警拘捕一名戴口罩嘅本土派人士返警署協助調查。

平靜過後,近期做戲做上癮嘅李偲嫣又再以騎呢造型登台演出。先係着上格仔校服扮學生「豬妹」登場,同場角色有戴住面具嘅肥佬黎、民主阿婆、瞓街卿等等,話收黑金可以有車有樓兼月搵幾萬蚊,加埋成班大媽伴舞添!話劇做完,李偲嫣仲未夠喉,同場加映頭條劇場,諷刺電台時事節目,以新造型身穿袈裟扮唐三藏,話「傷港電台」同「毒蘋果」毒過「貞子」,叫孫悟空伏妖喎!

一班熱血公民同本土派本來好激動,一睇到個劇場都即刻呆晒,唔知好嬲定好笑。