香港大學副校長任命風波愈演愈烈，學生上周二強闖校委會會議室，圍堵禁錮校委，引起社會各界不滿，事件同大半年前發生嘅佔領運動好似翻版咁，學生硬要勇武抗爭，搞到同樣反對校委會遲遲未任命嘅泛民政黨無奈癲埋一份，結果學生被鬧，但未必有手尾，被拉落水嘅泛民政黨就要付出政治代價，家吓已見教育界嘅立法會代表葉建源同公文袋黨魁梁家傑等畀人鬧，遲吓區選又可能再孭票債票償嘅鑊，呢次真係玩火自焚囉。

「偷雞唔到蝕把米」

七十九日嘅佔領行動由學生主導，泛民中人好明顯畀學生「夾上轎」，勢估唔到喺港大事件中抽水嘅泛民政黨，今次又因港大學生而中招，衝擊當晚，唔同政黨嘅港大舊生喺港大鈕魯詩樓門口表達意見，本來同喺十樓衝入會議室嘅學生完全無關，至於樓下圍堵校委嘅人，正如袁國勇話，大部分「粗口爛舌」，同一眼就畀人認到嘅政黨人士亦無關，但係泛民中人今次一樣遭狠批，有人衰冷眼旁觀，有人衰發揮公職人員嘅影響力。

好似瞓身支持學生嘅公民黨咁，淨係圍觀校委被堵事件中，就有梁家傑、余若薇全程在場，但兩人翹手不理，當然被質疑見死不救嘞，甚至不制止侵犯人權嘅罪行嘞，民主黨嘅單仲偕當晚一度在場，但佢出現一陣就閃人，算係執身彩。政黨中人掛住抽水，但葉建源同公文袋呢次抽水唔成，仲要背負罵名，真係「偷雞唔到蝕把米」！