年底起，選舉一浪接一浪，先有區議會選舉，然後有新東立法會補選，公民黨（公文袋）有意力捧新進大狀楊岳橋（Alvin），一度計劃補選之外，亦會派佢喺區議會選舉挑戰現任火炭區議員、有「西環契女」之稱嘅龐愛蘭，不過，有傳Alvin因無辦法兼顧兩個選舉工程，準備棄選火炭，無暇應付會唔會只係藉口呢，驚輸咗區選影響補選呀？不過，佢呢頭縮，龐愛蘭就有意挺進，話仍在考慮是否出戰新東補選，如果敲定，佢即係仲要狙擊番Alvin，真係一副擂台戰鬥格噃！

Alvin近月都較少落火炭擺街站、接觸街坊，同年初比較明顯唔同，據了解，Alvin棄選與原定落戶火炭嘅經民聯申偉基被勸退有好大關係，早前一直傳申偉基會挑戰已連任兩屆嘅龐愛蘭，建制派鷸蚌相爭，本來想享漁人之利，但申最近改為落戶將軍澳，勝算大減下，寧願不戰。

易輸開有條路

呢個決定其實亦係前車可鑑，事關Alvin前黨友兼師傅湯家驊上屆以時任立法會議員身份出戰沙田第一城，最後都係千幾票慘敗建制對手，Alvin嘅地區工作同留喺當區八年以上嘅龐愛蘭真係冇得比，容乜易「輸開有條路」o架，或者係咁，縮沙就成為穩陣嘅策略。

不過，佢呢頭做區選逃兵，龐愛蘭區選有望自動當選之餘，仲對其決定感到可惜，話有對手先可以鞭撻吓自己。咁都未算，二○一二年參加新東立法會選舉落敗嘅龐愛蘭又話，仲考慮緊係咪出戰新東補選，意味她隨時會追擊番楊岳橋。

另外，港大微生物學教授袁國勇辭任校委會成員，龐愛蘭話好理解對方，因自己身為藥劑師，與袁同屬專業人士，唔想花太多時間和精力喺一啲無結果嘅事情上，希望各方人士反省。