光影匯演釀噪音 吸客不成變趕客
香港得天獨厚，維港靚景每年吸引唔少旅客慕名而來，可惜吖，當局捉到鹿唔識脫角，唔單止冇好好利用先天優勢，反而畫蛇添足，冇嗰樣整嗰樣，結果弄巧反拙，吸客變趕客，令人啼笑皆非。
話說旅發局由舊年開始喺尖沙咀文化中心及前九廣鐵路鐘樓外牆，舉辦名為「閃躍維港3D光雕」嘅光影匯演，話透過立體投影技術、燈光同音響效果，等旅客可以體驗香港多姿多采嘅都會魅力喎。即係咁，呢項構思無疑幾吸引，弊在眼高手低，搞到烏龍百出，特別係噪音問題，更引起劣評如潮。記者現場量度過，部分位置聲浪高達一百分貝，好多人睇咗一分鐘就頂唔順離開，寧願靜靜哋拍攝維港夜景。你話嘞，光影匯演變成噪音擾客，係咪搵嚟搞吖。
又難怪旅客走夾唔抖嘅，正如專家話齋，一百分貝相當於裝修時電鑽發出嘅聲音，長時間停留喺咁嘅環境，可能導致呼吸不暢、煩躁甚至短暫性失聰，唔係講玩o架！
噪音擾客都算喇，最慘係成個匯演不知所謂，好多人睇完一頭霧水。真係諗極都唔明，光影匯演喺世界各地好普遍，好似墨西哥咁，喺城牆上重現當年海盜入侵嘅情景，令觀眾留下深刻印象，點解人哋搞得有聲有色，香港就搞到不倫不類？唔通真係橘越淮而枳？點都好喇，唔該旅發局正視問題，盡快改善，否則，吸客不成反擾客，仲要浪費大量公帑，盞唔衰攞嚟衰嘅咋。
其實，香港都唔係一無是處嘅，同樣以維港夜景做賣點嘅「幻彩詠香江」，旅客讚不絕口，國際口碑載道，甚至被健力士世界紀錄大全列為「全球最大型燈光音樂匯演」。所以話，好多嘢事在人為，關鍵係有冇心做好啲啫。
話時話，雖然香港只係彈丸之地，但只要好好包裝，旅遊資源都唔少o架。除咗維港之外，離島、郊野公園以至考古遺迹，應有盡有，各具特色，問題係港產官僚講多過做，旅遊資源再多都嘥氣啦。唔使講第樣，淨係發展海濱長廊，講嚟講去得個吉；又例如發展大嶼山，一時橋頭經濟，一時水療中心，講到天花龍鳳，到頭來又係大隻講。
點講都好喇，諗多啲橋段推廣香港，方向絕對正確，但一係唔搞，一搞就要好好睇睇，好似光影匯演咁，只要改善噪音問題，旅客歡迎，市民支持，咁咪皆大歡喜囉！
