白鴿黨大分裂將至，已被踢出民主黨（白鴿黨）嘅前立法會議員黃成智同遲早會被踢出黨嘅前立法局議員狄志遠，將會籌組一個溫和泛民新政黨，搶攻年底區議會同明年立法會選舉。黃成智尋日爆料，新政黨嘅核心成員仲有兩名前白鴿黨員，包括葵青區議會前主席周奕希同前白鴿黨總幹事陳家偉，另外仲有三名地區白鴿黨員打算投靠該陣營喎。

稱主打第三條路

陳家偉四年前被踢爆捲入香檳大廈涉召妓事件，其後辭去總幹事職務兼退黨，此番再埋成智陣營，似乎有意喺政壇企番起嚟。不過，成智曾經講過唔會向白鴿黨挖角，依家卻有多名前黨友轉投其陣營，究竟邊個做主動呢？狄志遠解釋，佢哋並冇主動拉攏白鴿黨員，但亦唔會拒絕主動找上門嘅人，又指除白鴿黨黨員，仲有其他非民主黨現任區議員向佢哋投石問路，查詢「過檔」情況。

黃成智就強調，佢哋主打「第三條路」，即唔想支持激進泛民，但亦唔會轉投建制派懷抱，強調只有透過選舉先至可以展示政治實力，但新政黨未必趕及年底區選前成立，屆時或會用其他名義出選。

第一手消息請下載on.cc東網iPhone/iPad/Android/Windows Phone Apps