政壇：團體港大示威錯字連篇
香港大學校務委員會周二決定繼續「等埋副校」，大批學生佔領會場、禁錮校委，引來社會關注。有團體一連兩日去港大請願，要求校長馬斐森下台兼鬧爆學生唔好好讀書。不過，呢班示威者「有口話人，無口話自己」，佢哋手持嘅示威標語錯字百出，例如「禁錮」變「禁固」、「做媒」變「做枚」，就連港大校長「馬斐森」都變成「馬婓深」。睇嚟要認真讀書嘅唔單止係學生，呢班示威者得閒都應該睇番吓書喎！
示威者展示錯字百出嘅標語。
尋日出動嘅示威團體包括珍惜群組、同心護港、和平論壇同忠義民團等，共四十多人。為咗表現自己嘅學養，佢哋放棄傳統口號，扮高深叫嚷「士可忍、孰不可忍」。佢哋又批評馬斐森領導無方，縱容學生，促革除佢嘅校長職務。
問到佢哋同港大有咩關係，佢哋就只係騎呢自稱係「家長」，講到標語錯漏百出，一名自稱趙子龍嘅行動組織者倪志榮仲好自豪話，示威標語係佢一手一腳創作嘅，認真搞笑。呢啲係咪「小時唔讀書，大個變蠢豬」嘅反面教材呢？
