機場上演全武行 文明旅遊大隻講

講緊嘅之唔係內地旅客大鬧香港機場事件囉。日前一班前往北京嘅香港航空客機，因為受天氣及北京空管影響，遲遲未能起飛，部分乘客失去耐性，向地勤職員大興問罪之師，初則口角，繼而動武，場面七國咁亂，搞到要出動機場特警及保安控制場面，七名地勤人員報稱遇襲受傷，六名內地旅客被捕。結果其中四人判囚九至十一日，另外一人罰款一千五百元，仲有一人保釋候審，你話係咪唔衰攞嚟衰吖？

即係咁，航班一延再延，旅客一等再等，心情煩躁絕對可以理解。之但係，旅客發爛渣之前，都應該搞清楚問題源頭吖嘛，好明顯，今次延誤並唔係航空公司嘅責任，而係內地天氣及空管問題，除咗老天爺同內地當局，怕且都冇人可以解決得到，內地旅客唔敢搵內地當局算帳，一味搵香港地勤職員出氣，仲有冇離譜啲吖。

一個巴掌拍不響，近年中港矛盾愈演愈烈，固然係部分港人言行偏激所致，但部分內地旅客不文明，屢勸不改，亦係難辭其咎。試諗吓，旅客去其他地方觀光，唔係入鄉隨俗，互相尊重，而係目無法紀，聲大夾惡，係人都反感喇。唔係講笑，中國雖然已經成為全球第一大旅遊消費國，但同時亦係全球最不受歡迎旅客第二位，證明金錢買得到名牌，買唔到尊重。

講起都醜怪，中國號稱五千年文明古國，但部分旅客嘅所作所為同原始人冇乜分別，遠嘅唔講，去年發生內地婦向曼谷空姐潑即食麵已經夠晒經典喇。連國家領導人都睇唔過眼，不斷呼籲國人文明出遊，年前內地仲推出《旅遊法》及實施《遊客不文明行為記錄管理暫行辦法》添。可惜講到口水都乾，國人劣根性始終不改，依然醜態百出，笑話多多，丟架丟到全世界。

一粒老鼠屎搞壞一鍋粥，內地旅客再唔提升文明，改善形象，隨時淪為過街老鼠都有之。不過講番轉頭，內地成日實施空管都唔係辦法，正如立法會議員話齋，再咁落去勢必破壞本港國際旅遊形象，民航處有責任向內地反映，唔好淨係識得豪花公帑吖，叮！