城中鏡：股東內訌張斌暫勝一仗
山水水泥畀天瑞出其不意做咗大股東，搞到公司唔夠公眾持股而要停牌之餘，天瑞仲幾乎想炒晒山水班董事，又上演一場股東內訌。尋日山水水泥召開股東特別大會，結果全部罷免現任董事嘅議案都遭高票否決，董事長張斌嘅陣營暫時贏咗一仗。
解鈴還需繫鈴人，張斌話要同天瑞認真溝通。（互聯網圖片）
罷免現任董事嘅議案係天瑞提出嘅，但天瑞早幾日前忽然「彈弓手」，收番罷免提議，但股東會表決冇因為咁取消。尋日嘅投票結果，罷免案超過99.9%票數否決，仲有十億股嘅股份冇投票，令人懷疑天瑞係咪冇投到票。
張斌喺股東會後難免向天瑞寸番兩嘴，話天瑞喺行內係「有口皆碑」，但又話公司復牌「解鈴還需繫鈴人」，要同天瑞認真溝通咁話。
