原民政事務局局長曾德成被「炒魷」，有傳係因為青年工作做得唔好，令青年問題再度炒熱。香港區潮人聯會近日就決定要加強青年工作，仲將原有嘅青年部升呢做青年委員會，青年事務委員會前主席陳振彬同民政事務局政治助理徐英偉都有捧場。青委會會長陳家榮話過往青年部經已有二千位成員，希望升呢後可以團結會員，壯大青年工作。

陳家榮（中）話青委會日漸壯大，希望將來搞多啲活動，旁為副主席許浚峰（左）同凌正賢（右）。

侯佳璇（右二）希望可以團結青年人做多啲公益事業，旁為青委會副秘書長蕭敏儀（右一）同執委胡綺華（左一）、楊珉維（左二）。

民政事務局換局長，徐英偉照樣代表局方密密落區搞關係。

傳承潮州人傳統

青委會升呢，唔通潮人聯會對青年工作「忽然關注」﹖陳家榮話佢哋只係覺得以往青年部做得唔夠，加上愈來愈多會員，所以希望趁機會壯大青年工作，透過舉辦多啲活動，加強同內地交流，拉近兩地距離。副會長侯佳璇就話依家部分青年人好偏激，希望青委會可以傳承潮州人互助互愛傳統，凝聚青年人做啲公益事業喎。

香港過去一年經歷佔領行動、「鳩嗚」等大型群眾示威，潮人聯會會長陳南坡就好感觸話，睇到青年工作真係好重要，又話覺得依家啲社會風氣麻麻哋，所以決定要喺青年工作上加大力度，將原有嘅青年部升呢，提供多啲資源發展。陳振彬做咗青年工作咁多年，唔知有冇向一班青委分享吓經驗同心得呢？

第一手消息請下載on.cc東網iPhone/iPad/Android/Windows Phone Apps