政壇：搞搞政：肥佬黎自身難保公文袋捐款急跌
經營不善嘅壹傳媒早已傳出陷入財政困難，作為泛民主派最大金主嘅集團前主席「肥佬黎」黎智英都自身難保，有人就估計佢呢段時間應會減少捐款支持泛民。無獨有偶，之前有份收取肥佬黎超過六百萬元捐款嘅公文袋最近就大呻無錢，唔通肥佬黎真喺閂水喉？有公文袋成員透露，今年確實少咗六位數字嘅捐款，更加暗示捐款同肥佬黎有關，仲話依家個個黨友奉命撲水，以免經過今明兩年多場選舉後因財困而亡黨。
（設計圖片及對白）
之前七一遊行，公文袋喺所有泛民政黨籌款數字插水嘅情況下仍逆市上升，籌到四十三萬元，理應唔愁無錢，但佢哋條數其實係計埋賣毛巾同衫，所以扣埋成本都唔算賺好多，又被批評佢哋支持港獨，唔少商界支持者都閂埋水喉，唔再支持該黨，咁數數吓該黨資金來源又真係剩番好少。最弊就係該黨一直依賴嘅肥佬黎條水喉，如今都變得「水滴滴」，一講到錢，睇怕民主都無情講嘞！
鬧人才荒 失專業光環
據了解，該黨依家每次開會都有人要督促黨友落力撲水，否則可能過埋三場選舉，包括年底區議會、明年立法會選舉及新東補選之後，就山窮水盡，隨時要執笠。而該黨下周日（8月2日）更加搞咗個獅子山遠足籌款活動，目標係籌六十萬元喎。咁猴擒，睇得出佢哋幾心急籌錢。
除咗缺錢，公文袋都鬧緊人才荒，原來佔領行動後，加入公文袋嘅人數每個月只徘徊喺個位數字，淪落到有人覺得「有（人加入）就已經好好」。而公文袋失去以前大狀黨嘅專業光環後，加入該黨嘅人已由過去嘅專業人士，變為依家大部分都係學生。專業人士寧願加入佔領之後冒起嘅專業團體，好似法政匯思、杏林覺醒咁，都唔加入已變得激進嘅公文袋，人財兩失之下，該黨都應該諗吓，愈走愈激係咪正確，否則「黨之將亡，指日可待」呀！
