亞視新聞喺一一年誤報前國家主席江澤民嘅死訊，被當時嘅廣播事務管理局（通訊事務管理局前身）重罰三十萬元後，通訊局前日再就亞視新聞報錯「王維基買亞視」，同樣重罰三十萬元，但估唔到尋日又再「甩轆」！亞視尋日新聞報道畫面底部嘅流動字幕，全部變成前日嘅新聞提要，仲要播足超過一分鐘，如果今次又被人寫信去通訊局投訴，唔知又要罰幾多錢呢？

亞視新聞尋日又再「甩轆」，螢光幕底部嘅流動字幕全部顯示前日嘅新聞提要。（亞視畫面）

亞視新聞畫面底部通常會有一行藍色嘅流動字幕，顯示當日嘅新聞提要，但尋日亞視《六點鐘新聞》報道嘅流動字幕，一開始就重播前日嘅「舊聞」，包括「啟德煥然壹居市價八折出售」、「私隱專員公署指公共登記冊保障不足」同「熊貓佳佳將37歲海洋公司舉行生日會」等等，仲要播足分幾鐘，工作人員先知道「甩轆」出錯，即時更正尋日嘅「新聞」提要。

不過，報錯新聞對現時嘅亞視可說是「零壓力」，因為通訊局嘅「極刑」釘牌已對亞視完全失效，原因係亞視嘅續牌申請已經喺今年四月被行政長官會同行政會議拒絕。此外，今日亞視宣布由八月一日開始，恢復《亞洲早晨》同《十二點半新聞》兩個新聞時段，報新聞時間多咗，豈不是增加出錯嘅機會？

第一手消息請下載on.cc東網iPhone/iPad/Android/Windows Phone Apps