政壇：民協陽盛陰衰唔打靚女戰
民協嘅立法會議員馮檢基，尋日聯同一班有意出戰十一月底區議會選舉嘅現任區議員同社區主任見傳媒，但一行八人就全男班，莫非民協蜀中無女將？民協副主席譚國僑話，其實除咗現任女區議員會角逐連任外，佢哋仲有一位加入咗民協兩年嘅女碩士都準備出選，只係佢有工作在身未能出席啫！不過，睇勻民協都係「陽盛陰衰」，冇學其他黨派咁選擇打靚女選戰，似乎唔驚輸蝕咁喎。
馮檢基（右一）同部分有意參選區議會嘅人士亮相。
譚國僑話今次區議會選舉除要力保現有十六席外，亦希望喺議席上可以有所增長，佢哋九月會確認參選名單，預料有二十五至三十人參選。佢又話民協為咗做到「有承傳、有接班」，會用「一壯一嫩」策略，由地區工作經驗較多嘅前輩帶住後生仔一齊宣傳。
今屆區議會選舉，泛民除咗要同建制派對撼外，亦要面對「傘兵」挑戰。譚國僑話暫唔方便透露佢哋邊啲區會遇上「傘兵」，但就話建制派已開始對佢哋實施「拔筍」行動，包括派傳單抹黑、違規掛橫額、蛇齋餅糉送埋上門等。但佢哋已對抹黑即澄清反擊，仲叫街坊「有嘢一定攞，投票第二個」咁話。
