政壇：泛民建制 民望齊插水
仲記得立法會上月否決政改方案，一班建制派議員「甩轆」臨場冇投票，及後互相批評，亦有人指泛民主派係「普選殺手」。唔知市民係咪眼見立會內爭拗不斷，尋日就有民調顯示，有六成受訪市民對政黨印象欠佳；亦有調查顯示，受訪市民對整體議員表現，較兩個月前下跌，當中以工黨何秀蘭、公文袋陳家洛、立法會主席曾鈺成同工聯會陳婉嫻跌幅最大。
（設計圖片及對白）
何秀蘭陳家洛跌幅大
中大香港亞太研究所喺今個月二十一至二十三日，以電話訪問八百一十四人，六成一受訪者話對政黨整體表現變差，五成四對政黨發展不表樂觀，四成四唔滿意政黨表現，最多受訪者認為政黨經常互相爭拗，根本做唔到實事，足足有五成七。問到支持嘅政黨，一成一揀建仔，其次係白鴿黨、公文袋，但值得留意嘅係，有五成五受訪者話冇政黨值得支持。
香港研究協會就喺今個月二十一至二十八日，以電話訪問一千三百一十八人，對直選同超級區議會議員評分。對比兩個月前，雖然曾鈺成仲有三點六分，係最高分議員，但都跌咗零點三六分，佢曾經承認自己加入建制派WhatsApp群組係「添煩添亂」，相信都係咁先大跌。另外一名建制派陳婉嫻，同樣下跌零點三六分，協會話相信同懷仔事件負面影響有關。此外，建仔葛珮帆亦下跌零點三二分。
雖然建制派評分下跌，但泛民都唔好開心得咁早，原來何秀蘭同陳家洛跌幅仲大過建制派，兩人評分分別跌咗零點五五分同零點五三分，唔知係咪支持政改選民將否決責任歸咎於佢哋呢？至於整體議員表現，亦下跌咗零點一一分，至二點四四分，尤以直選議員表現有所下跌，協會呼籲佢哋趁休會，認真檢討過往工作，紓緩政改期間同中央及政府緊張關係，造福市民咁話。
