智力落後父母慌 鉛水風波手尾長

當局安排多條鉛水屋邨六歲以下小童驗血，其中首批二十三名超標嘅兒童日前接受衞生署體能智力測試，發現當中三人出現智力發展遲緩徵狀，要再作跟進，包括早前驗出血含鉛量最高嘅一名十一個月大男嬰以及另外兩名三歲男童，另外有五名兒童亦出現輕微遲緩徵狀。將來會有幾多兒童驗出事，真係冇人知o架。

小朋友智力遲緩係咪同鉛水有關呢？食衞局局長高永文係咁講嘅，研究的確顯示居民血含鉛量同食水有關，但智力發展受好多因素影響，血含鉛量只係其中之一。佢又強調科學上難以界定兩者之間有無關係，要持續跟進至可以知道佢哋發展偏差有幾多喎。

嗱，連高局長自己都承認，今次事件可能引發索償潮，可能因為咁，所以模棱兩可大耍官腔。既然官老爺都唔敢寫包單話冇事，家長唔擔心就假咯，有人自費為仔女進行智力測試，亦有人唔放心測試結果，要求驗多次。又難怪嘅，小朋友智力發展遲過人，成世人都受影響，點樣小心都唔過分喇。

鉛水風波愈鬧愈大，已經搞到人心惶惶，受影響嘅點止小朋友同父母吖！好似其中一條受影響嘅小泉澳邨咁，唔少準住戶堅持等到事件解決至入伙，寧願納空租都在所不惜。今時今日，蝸居難求，輪候公屋條龍隨時仲長過萬里長城，上到樓照計開心都嚟唔切，家陣反而爆發「拒上樓潮」，可想而知鉛水有幾可怕。

咁都未算吖。前線醫護十個煲得七個蓋，早就做到踢晒腳，依家仲要幫咁多市民驗血，千手觀音都唔掂喇。唔係講笑，當局出動瑪嘉烈等四間醫院驗血，結果都係頂唔順，搞到要「外判」畀美國化驗所。所以話，鉛水危機手尾長，而且係牽一髮動全身，萬一唔好彩再爆單大型公共衞生事故，後果不堪設想。

點講都好，依家最緊要係搵出問題源頭同埋解決辦法。港府開口埋口專注民生，食水安全關係到千家萬戶嘅健康，咪就係最大嘅民生事務囉。話時話，區議會選舉在即，政客借題發揮預咗o架嘞，唔該港府諗吓點拆彈喇，叮！