政壇：搞搞政：政改甩轆京官新解 富貴黨被指「元兇」
喺政改表決「甩轆」發生後，外界普遍認為主張「等埋發叔」嘅經民聯副主席林健鋒，以及發動拉隊離場失敗嘅建制派「班長」兼民建聯黨鞭葉國謙，須為事件負上最大責任。兩人事後不但要公開道歉，政治生涯亦面臨「一鋪清袋」。事隔約一個月，據聞北京對事件有咗新解讀，認為當時帶頭拒跟大隊離場嘅富貴黨，先至係連累其他建制派甩轆嘅「元兇」。
設計圖片及對白
世紀大甩轆事件源於林健鋒同葉國謙為咗等候劉皇發趕返立法會投票，臨急發起拉隊離場行動，望令會議因不足法定人數而暫停，但一向「離群」嘅富貴黨五名議員冇離場，工聯會陳婉嫻、保險界陳健波及廠商會林大輝見狀亦決定留低，令會議廳維持足夠法定人數，最終政改方案好意外咁喺八票贊成、二十八票反對下，大比數被否決。
事發後曾有建制派提出，若富貴黨等人肯跟大隊離場就唔會甩轆，但富貴黨田北俊同林大輝則反責離場議員無事先做好溝通，堅稱留低投票先至正確，並自爆有中聯辦官員來電表揚。其中田北俊更多次喺社交網站譏諷其他建制派係「豬」及「人蠢無藥醫」。
「等埋發叔」體現團結
但消息指負責港澳事務嘅北京官員並唔認同上述結論。由於政改甩轆茲事體大，北京事後要求部分本港愛國團體及單位就事件提交報告，最終結論有二，一係將甩轆定性為技術性錯誤，事關政改遭否決嘅結局一早已知，特區政府及冇投票嘅建制派都毋須太自責；二係北京認為表決甩轆與其後嘅建制派WhatsApp群組對話外洩事件，凸顯建制派唔夠團結，各黨派與獨立議員存在深層次矛盾，必須正視及糾正。
有京官認為，離場建制派為求「等埋發叔」，令支持政改票數「一票都不能少」，即使做法愚蠢，但總算係體現團結，林健鋒及葉國謙等甩轆「罪人」有望「平反」。反觀富貴黨帶頭拒絕離場，事後又對其他同僚冷嘲熱諷，先係唔團結嘅表現，尤其富貴黨曾喺《基本法》廿三條一役倒戈、田北俊又喺佔領敏感時刻公開要求特首梁振英下台擾亂軍心，對北京而言可謂劣迹斑斑。
據聞有關「定調」一出，有曾因留在會議廳投票而獲讚嘅建制派議員深表憤怒，更聲言今後與有關人士講電話要錄音留底喎。
