政壇：曾德成「局長網誌」摺埋
原民政事務局局長曾德成喺本月二十一日突然被「炒魷魚」後，佢寫咗至少六年、逢周末或周日發表嘅網誌「局長隨筆」，有人發現尋日於民政局網頁已經搵唔到「局長隨筆」一欄，另一方面局長網誌會否繼續存在，就要視乎新任民政局局長劉江華會否接力執筆或搵人代筆，但據悉劉江華尋日冇發表網誌，至於係咪另有計劃或打算，相信只有佢本人至知嘞！
曾德成（左一）嘅局長網誌已成絕響。（互聯網圖片）
翻查紀錄資料，曾德成喺長達八年嘅局長生涯中，累計已經發表三百幾篇網誌，平均每星期一篇，內容天南地北，有時亦會為局方負責嘅政策解畫，包括早前曾撰寫網誌反駁有關啟德體育園被批為「大白象」嘅質疑。
曾德成發表嘅最後一篇網誌係上周日，內容講述暑期內地實習，並附上曾德成與大專生交流嘅圖片。未知劉江華會否同樣以筆教化青年網友，定係會改用其他更潮嘅方式呢？
至於逃過被「炒魷魚」劫數嘅財爺鬍鬚曾就繼續做「鍵盤戰士」寫網誌。佢提到早前曾經訪問福建自貿區，話香港、福建同東盟三方可以喺「一帶一路」框架下加強合作。
