政壇：孫穎愛畫搞私人藝術館
有「鋼琴公主」同「琵琶公主」美譽嘅孫穎既鍾情於音樂，亦係愛畫之人，擁超過二百幅、估計共值逾億元嘅名畫收藏，佢更將私人住宅打造成私人藝術館，將珍貴收藏公諸同好，邀請同道中人賞畫談藝術。
孫穎同劉詩昆喺歐洲旅行時不忘到畫廊買心頭好。
黃永玉特別為孫穎所畫的作品（箭嘴示）。
孫穎稱自小已愛畫，一直有收藏名畫嘅嗜好，後來遇上靈魂伴侶兼鋼琴大師劉詩昆，對方同樣愛畫，於是決定將兩個住宅單位打通，建立一個五千多呎嘅私人藝術館。提到藏品嘅市值，孫穎坦言難以估計，因部分有逾六十年歷史，且出自趙無極、吳冠中等大師級之手，係佢哋特別為劉詩昆而作的畫，要經過拍賣先知實際價值，佢保守估計逾億，但佢揚言所有畫作唔會出售，但若遇有緣人唔介意相贈，因佢嘅部分收藏係由朋友割愛送贈畀佢。
孫穎喜歡擁有深層次感情嘅畫作，佢笑謂前世可能係歐洲人，尤其特別鍾情歐洲之物，佢近年迷上咗一位俄羅斯女畫家Galina Rusak嘅作品，對方長居於當地深山，與世隔絕，佢係通過一位歐洲嘅鋼琴大師先有幸買到對方作品，現時擁有對方八幅畫作。
至於最特別之作品，要算係由黃永玉為佢所繪畫之畫：「幅畫係我一邊彈琵琶，黃永玉大師一邊畫我，有人話願出五百萬買我呢幅畫，但係我唔會賣，會陪我一世。」
