政壇：泛民退修營炒冷飯
十一月下旬就係區議會換屆選舉，泛民主派尋日搞咗個退修營，傾吓未來發展路向，共有十六名議員出席。閉門傾咗成日得出乜嘢結果呢？泛民飯盒會召集人「袋巾傑」梁家傑聲稱，大家嘅共識之一係樂意同中央溝通。不過，泛民成日將呢句話掛喺嘴邊，了無新意，但就好識得整色整水，話要將飯盒會延伸至全港十八區，講到尾咪又係做騷。
設計圖片及對白
AV仁疑瞌眼瞓
今次退修營由朝開到晚，白鴿黨同工黨最畀面，全部議員到齊晒，仲有資訊科技界嘅莫乃光同衞生服務界嘅李國麟都在場。唔知係咪攰得滯，會後一眾議員排排坐見傳媒時，坐喺後排嘅白鴿黨「AV仁」何俊仁疑似瞌眼瞓，冇厘神氣。
講到會議成果，就真係令人瞌眼瞓。共識係樂意同中央溝通，真係全無新意，但過往真係有機會同北京溝通時，一係玩杯葛，得小貓三四隻赴會，一係就帶埋傳單去派街，溝通只係得把口。而飯盒會話要將飯盒會模式延伸至全港十八區，喺各區成立會議平台，發掘議題跟進，好似荃灣泛民政黨跟進地區重點項目。但講到明喺區選同泛民打對台嘅組織就冇份。
佢哋又會同公民社會、傘後專業團體多溝通，發揮協同效應。白鴿黨嘅劉慧卿話，以往泛民喺立法會選舉層面冇協調，明年選舉前，泛民可考慮協調吓喎。講起飯盒會，袋巾傑下個立法年度就會退任，交由工黨何秀蘭接任。而內務委員會副主席人選，據聞泛民講到明唔同意建制派欽點人選，至於係邊個做，要暑假後再傾。
