屯院搞錯肝數據 醫療亂象陸續來
家陣香港好似撞邪咁，怪事接二連三，搞到成個社會立立亂，鉛水風波愈鬧愈大，醫療事故更係無日無之。呢，瑪麗醫院啱啱爆發霉菌奪命恐慌，又輪到屯門醫院搞錯肝酵素數據，近萬病人受影響，呢啲咪叫衰開有條路囉。
係咁嘅，屯門醫院一部檢驗肝酵素水平嘅儀器，自兩年前投入服務以來，一直錯誤將六十歲以上男女病人嘅肝酵素水平參考數值對調，以致男病人有機會超標而不被發現，人數多達四千六百幾人，當中有一千四百多人已經離世，如果連同女病人計算在內，受影響病人接近一萬，都咪話唔大鑊。
大家都知，中醫有所謂望聞問切，西醫亦差唔多，醫治病人前必須經過詳細檢查同分析，數據出錯後果可大可小o架。女病人都好啲，參考值範圍被收窄，最多都係做多咗檢查啫，男病人就冇咁好彩嘞，參考值範圍被擴大，超標病人隨時被以為正常而延誤醫治。好明顯，今次事件由儀器設定、輸入數據以至檢查數據，環環出錯，而且屬於人為錯失，唔止兒戲，簡直係靠害。
當局例牌又係賊過興兵，屯門醫院向受影響病人耍冧之餘，仲即時覆核病歷，目前已睇咗逾千份男病人病歷，當中二百多人需要提前覆診。院方強調，數據出錯對驗血準確度冇影響，暫時亦冇迹象顯示病人死亡與此有關喎。新界西醫院聯網總監仲話會成立專家委員會深入調查事件，八周內向醫管局提交報告添。
即係咁，公立醫院醫療事故五花八門，層出不窮，早就唔係新聞嘞，弊就弊在當局每次都話會深入調查，每次都話會吸取教訓，但每次都係大隻講，搞到醫療事故鑊鑊新鮮鑊鑊甘。冇冤枉o架，屯門醫院去年亦發生過類似事故，內科及老人科專科門診被揭發更新系統設定出錯，一年來都無按程序自動列印病人化驗病理報告，追查之下，仲發現有八百多份報告「被失蹤」添。當時屯院口口聲聲檢討改善，結果係點？大家有眼見喇。
話時話，港府最近提出醫管局改革方案，似模似樣咁，可惜又係換湯不換藥，聯網制度造成嘅山頭主義及資源分配不均依然存在，撥亂反正談何容易。講到尾，自從佔領之亂後，成個社會好似中咗政治病毒咁，港府自顧不暇，仲邊有精力改善醫療問題吖。香港步向衰落，福地淪為亂地，怕且已成定局咯，叮！
